Вазирлар Маҳкамасининг 20 апрелдаги қарори билан белгиланган ва қарор қабул қилинганидан уч ой ўтиб кучга кирмоқда. Қарор билан 1 майдан бошлаб жисмоний шахслар учун шахсий эҳтиёж товарларини Ўзбекистонга божсиз олиб кириш нормалари камайтирилган. Давлат божхона қўмитаси 20 июлдан бошлаб шахсий эҳтиёж учун товарларни мамлакатга божсиз олиб кириш лимитидан фойдаланиш учун чет элда бўлишнинг минимал муддати жорий этилишини эслатиб ўтди.

Унга кўра, пиёда ёки автомобилда кираётган фуқаролар бу лимитдан фойдаланиш учун чет элда камида икки кун, самолётда қайтаётганлар эса камида уч кун бўлишлари керак. Акс ҳолда олиб кирилган товарлар белгиланган лимитдан ошган деб ҳисобланиб, уларнинг тўлиқ қийматидан 30 фоиз миқдорида ягона божхона тўлови ундирилади.

1 майдан

• Самолетда 1000 АҚШ долларигача (бунгача 2000 доллар эди);
• темир йўл ва дарё транспортида 500 АҚШ долларигача (1000 доллар эди);
• автомобиль ва пиёда ўтказиш пунктлари орқали 300 долларгача қийматдаги товарларни шахсий эҳтиёж учун божсиз олиб кириш мумкин.

Шунингдек, жисмоний шахсларга халқаро курьерлик жўнатмалари орқали етказиб бериладиган товарлар учун ставка ҳар чоракда 1000 АҚШ долларидан ойига 200 АҚШ долларигача қисқартирилган. Почта орқали қабул қилинган товарлар учун лимит 100 АҚШ доллар миқдорида қолган.