Nature Human Behaviour журналида эълон қилинган мақола албатта кишини ўйлантириб қўяди. Чунки гаджетлар пайдо бўлгандан то ҳозирги тараққиёт босқичигача кўтарилгунга қадар уларнинг зарари, мияни заифлаштириши ва яна бошқа салбий оқибатларга олиб келиши ҳақидаги хабарларни етарлича эшитдик, ўқидик. Аммо энди бу қарашлар эскирганга ўхшайди.

Гап шундаки, яқинда гаджетлар, масалан, компьютер, смартфон, бундан ташқари, интернет инсон миясини тез қаришдан сақлаб қолиши олимлар томонидан исботланган.

Бунинг учун 57 та илмий иш таҳлил қилиниб ва 50 ёшдан ошган 411 минг нафардан ортиқ иштирокчи (уларнинг ўртача ёши 68,7) тадқиқотларга жалб этилган.

Натижаларга кўра, рақамли технологиялардан фойдаланиш когнитив заифлашув хавфини 58 фоизга камайтириши, шунингдек, вақт ўтиши билан миянинг қариб, яхши ишламай қолишини жараёни(деменция)ни 26 фоизга секинлаштириши исботланган.

Таъкидлаш лозим, респондентларнинг кўрсатган натижалари уларнинг ёши, жинси, соғлиги, таълим даражаси билан ҳам боғлиқ эмас экан.

Ушбу янгилик азалдан келаётган «рақамли деманс» ғоясини рад этишга ва «технологик захира» (технологиялар билан фаол шуғулланиш миянинг соғломлигини сақлашга ёрдам бериши) назариясини қўллаб-қувватлашга ундайди.

Мутахассислар бу натижаларни ижобий баҳолаш билан бирга технологиялардан қандай ва қачон фойдаланиш муҳимлигини ҳам таъкидламоқда. Масалан, фақат пассив равишда экранга қараб ўтириш эмас, балки фаол иштирок этишгина мисол учун, янгилик ўқиш, дўстлар билан мулоқот қилиш) миянинг фаолиятини кучайтиради. Бироқ шунда ҳам зўриқиб кетмаслик зарур.