2025 йил 2 июлдан бошлаб тўлов тизимлари, электрон пуллар тизимлари ва тўлов ташкилотлари фаолияти устидан назорат кучайтирилади.

Марказий банк ва Бош прокуратура ҳузуридаги Иқтисодий жиноятларга қарши курашиш департаменти томонидан ишлаб чиқилган қарорга кўра, эндиликда тўлов ташкилотлари қуйидаги ҳолларда мижозларни текшириш бўйича мустақил чоралар кўриши шарт:

▪️ жисмоний шахс тўлов ташкилоти мобил иловаси орқали аккаунт очиш учун мурожаат қилганда;

▪️ Электрон терминалдан (Э-ПОС) фойдаланиш учун мурожаат қилганда;

▪️ БҲМнинг 500 бараварига тенг (187,5 миллион сўм) ёки ундан ошган суммада тўлов ташкилоти мобил иловасида аккаунт очмасдан ёки мобил иловасидаги аккаунтдан фойдаланмасдан операцияларни амалга оширишда;

▪️ мижоз тўғрисида аввал олинган маълумотлар тўғрилигига ёки етарли эканлигига нисбатан гумонлар мавжуд бўлганда.

Бундан ташқари, ҳужжатда 11,25 млн сўмдан юқори электрон пул ўтказмаларида жўнатувчи ва олувчи ҳақидаги тўлиқ идентификацион маълумотлар илова қилиниши мажбурийлиги бўлади. Бунда:

➖ Жисмоний шахслар: паспорт ёки ИД-карта рақами, туғилган сана ва жойни;

➖ Юридик шахслар учун: ташкилот номи ва STIR рақамни илова қилади.

Шу билан бирга, ҳар бир операция учун таваккалчилик даражасига мос аниқлик даражаси белгиланади ва идентификация маълумотлари алоҳида тартибда юритилади.

Маълумот учун, бундай чоралардан кўзланган мақсад пул ювиш, терроризм ва оммавий қирғин қуролларини молиялаштиришга қарши курашишдир.