Марказий Осиёда Қозоғистон 43-ўрин билан энг бахтли мамлакат бўлди.

Бирлашган Миллатлар Ташкилоти Халқаро бахт кунига бағишланган навбатдаги ҳисоботини эълон қилди. Унда одатдагидек, энг бахтли мамлакатлар рейтинги келтирилган. Рейтингда Финландия кетма-кет саккизинчи йил етакчилик қилмоқда.

Ўзбекистон бахтлилик даражаси бўйича 53-ўринни эгаллади. Қозоғистон 43-ўринда, Қирғизистон 75-ўринда, Тожикистон 90-ўринда қайд этилди. Туркманистон рўйхатга киритилмаган.

Рейтинг 140 дан ортиқ мамлакат аҳолиси ўртасида ўтказилган Gallup World Poll сўрови асосида тузилади. Унда сўнгги уч йилдаги ҳаёт сифатига қараб давлатларнинг бахтлилик даражаси баҳоланади.

Ҳужжатни ишлаб чиқишда экспертлар асосан аҳоли даромадлари, соғлиқ, ижтимоий қўллаб-қувватлаш, бандлик ва коррупция даражаси каби кўрсаткичларни ҳисобга олади. Бундан ташқари, рейтингда мамлакатда фуқаролик эркинликлари, хавфсизлик ва келажакка ишонч ҳисси мавжудлиги, шунингдек, оилаларнинг барқарорлиги кўрсаткичлари ҳам инобатга олинади.

Шимолий Европа давлатлари рейтингда етакчиликни давом эттирмоқда. Финландиядан кейин рўйхатдан Дания, Исландия ва Швеция жой олган. Норвегия бу йил еттинчи ўринни эгаллади.

Лотин Америкасининг икки мамлакати – Коста-Рика (олтинчи ўрин) ва Мексика (10-ўрин) биринчи марта энг бахтли мамлакатлар ўнталигига кирди. Шунингдек, кучли ўнликдан Нидерландия (бешинчи), Исроил (саккизинчи) ва Люксембург (тўққизинчи) жой олди.

АҚШ 2024 йилда биринчи марта дунёнинг энг бахтли 20 та мамлакати рўйхатидан тушиб қолганди, 2025 йилда эса мамлакат 24-ўринни эгаллади. Россия 66-ўринга кўтарилди, ўтган йили у 72-ўринда эди.

Энг бахтсиз мамлакатлар сифатида Серра-Леоне, Ливан, Малави ва Зимбабве тан олинган. Афғонистон кетма-кет олтинчи йил рейтингга якун ясамоқда.