Ўзбекистонда 2023 йилнинг май ойида бодринг нархлари апрель ойига нисбатан, яъни бир ойда ўртача 19,7 фоизга арзонлашди. Бу ҳақда Статистика агентлиги хабар берди.

Қайд этилишича, бодринг нархлари 2023 йил бошидан буён ўртача 54,7 фоизга арзонлашгани кузатилган.

2023 йилнинг май ойида ўтган ойга нисбатан:

• Помидор нархлари — ўртача 20,5 фоизга арзонлашган;
• Бақлажон нархлари — ўртача 25 фоизга арзонлашган;
• Сабзи нархлари — ўртача 3 фоизга ошган;
• Пиёз нархлари — ўртача 12,1 фоизга арзонлашган;
• Картошка нархлари — ўртача 0,5 фоизга арзонлашган.

Март охирларида қизил помидорнинг ўртача улгуржи нархи 29 фоизга ошганди — бу жорий улгуржи нархлар эса ўтган йилги даражадан деярли 2 баравар юқоридир. Охирги уч ойда ушбу маҳсулотлар нархининг жадал ўсаётгани ҳисобга олинса, жорий йил бошидан 24 мартгача Ўзбекистонда қизил юмалоқ помидорнинг улгуржи нархлари 2,4 баробарга ошган. Апрель ўрталарига келиб эса Ўзбекистонда сархил помидорнинг улгуржи нархи кескин пасайди.