Тошкент шаҳрида 28 апрель куни «Автомобилсиз кун» тадбири ўтказилади. Бу ҳақда шаҳар ҳокимлиги ахборот хизмати маълум қилди.

Шу боис ушбу кун доирасида шахсий автомобилларда ҳаракатланишни камайтириш, аҳоли орасида жамоат транспортидан ва велосипеддан фойдаланишнинг ҳамда пиёда юришнинг афзалликларини тарғиб этишга қаратилган кўплаб тадбирлар ташкил этилади.

Тадбирнинг аҳамияти – бир томондан инсонлар ўртасида соғлом турмуш тарзини тарғиб қилиш бўлса, иккинчи томондан атроф-муҳитда барқарорликни сақлаш, табиатга заҳарли газлар чиқишини имкон қадар камайтириш эканлиги таъкидланмоқда.

Маълумот учун, дунёда «Автомобилсиз кун» тадбири 1995 йилдан буён ўтказиб келинади.