Ижтимоий тармоқларда Тошкент шаҳрида 16 ёшли қиз жанжал сабаб бинонинг 3-қаватидан ўзини ташлагани ҳақида хабар тарқалди. Ҳолат Бош прокуратура томонидан ўрганиб чиқилди.

Қайд этилишича, жорий йилнинг 5 апрель куни Тошкент шаҳри Юнусобод туманида яшовчи 9-синф ўқувчиси Х.М. (16 ёшли қиз бола) яшаб келаётган уйнинг 3-қаватида балкон ойнасини артаётган вақтида эҳтиётсизлиги оқибатида йиқилиб, тан жароҳати олган.

Х.М.га дарҳол тез тиббий ёрдам кўрсатилиб, шифохонага олиб кетилган. Ҳозирда вояга етмаган Х.М.нинг аҳволи яхши экани айтилади.

Мазкур ҳолат юзасидан суд-тиббий экспертизаси тайинланган. Юнусобод тумани прокуратураси томонидан терговга қадар текширув ҳаракатлари олиб борилмоқда.