Жорий йилнинг 16 апрель куни ижтимоий тармоқларда автобус салонининг ички қисмида аёллар ва эркаклар учун махсус жой ажратилганлигини тарғиб қилувчи эълон жойлаштирилганлиги акс этган фото тарқалди.

Мазкур ҳолат юзасидан “Тошшаҳартрансхизмат” АЖ муносабат билдирди.

Қайд этилишича, ушбу ҳолат 8-Автобус саройи филиали тасарруфидаги “Исузу” русумли, 43-сонли автобус йўналишида кузатилганлиги аниқланган ҳамда автобус салонидаги мазкур эълон олиб ташланган.

“Юқоридаги каби ҳолатларни бартараф этиш мақсадида, барча автобус ҳайдовчилари ва чиптачилари ўртасида навбатдан ташқари йўриқномалар ўтказилаётганлигини, шунингдек, автобус салонида турли хилдаги ахборот материаллари тарқатилишини олдини олиш, жамоат транспортида эълон қилиниши белгиланмаган махсус постерлардан фойдаланмаслик ҳамда иш фаолияти давомида ҳайдовчи ва чиптачилардан янада ҳушёр ҳолда иш юритишлари юзасидан тушунтириш ишлари олиб борилганлигини маълум қиламиз”, – дейилади хабарда.