Бугун, 30 март куни Фарғона вилоятида «Халқ Конституцияси билан халқчил давлат сари» шиори остида Маънавият фестивали бошланди.

Унда элимизнинг таниқли олимлари, шоир ва ёзувчилари, маданият ва санъат намояндалари иштирок этмоқда.

Қувасой шаҳридаги «Дўстлик» маҳалла фуқаролар йиғинидаги маданият марказида Маънавият фестивали ўтказилди. Унда икки юздан зиёд аҳолининг турли қатлам вакиллари иштирок этди.

Республика Маънавият ва маърифат маркази раҳбари Минҳожиддин Мирзо, «Маърифат» тарғиботчилар жамияти аъзоси, фалсафа фанлари доктори Жамила Шермуҳаммедова янгиланаётган Конституциядаги муҳим ўзгаришлар ҳақида сўз юритди.

Сурхондарё вилоятининг Сариосиё ва Узун туманларида террорчиларга қарши жангда ҳалок бўлган қувасойлик Қаҳрамон Мадалиевнинг қизи Зайнура Саидова ўз ҳаёти мисолида ислоҳотлар самарасини гапириб берди.

Ўзбекистонда хизмат кўрсатган артист Дилфуза Раҳимова, «Ниҳол» мукофоти совриндори Адолат Исмоилова каби санъаткорларнинг она, ватан ва тинчлик ҳақидаги қўшиқлари кечага файз киритди.

Рамазон ойи эзгулик, хайру саховат ва меҳр-оқибат ойидир. Фарғонада давом этаётган Маънавият фестивали доирасида эзгу ташаббуслар кўнгилларга шодмонлик улашмоқда.

Пойтахтдан келган зиёлилар, шоир ва ёзувчилар, санъаткорлар бугун Қувасой шаҳридаги учрашувлар чоғида чегарадош ҳудуд – «Полмон» маҳалла фуқаролар йиғинида яшовчи Ҳаётхон Давронова ҳамда Нурхон Эргашева хонадонида бўлди. Ижтимоий дафтарда турувчи оила вакиллари билан самимий мулоқот қилиниб, совғалар топширилди.

Саксон ёшга яқинлашаётган Ҳаётхон ая бундай йўқловдан миннатдор бўлиб, юртимизга тинчлик, Президентимизга соғлик тилаб дуолар қилди. Бундай хайр-саховат тадбирлари барча жойларда ташкил этилмоқда.

Шунингдек, Фарғона шаҳридаги «Афросиёб» тантаналар мажмуасида бир гуруҳ ёши улуғ инсонлар, маҳалла фаоллари ҳамда ижтимоий ҳимояга муҳтож оилалар аъзолари меҳмон бўлишди. 500 нафарга яқин фуқаролар учун ифторлик дастурхони ёзилиб, маданий тадбир ҳам ўтказилди.

Мазкур тадбирда вилоят ва шаҳар ҳокимликлари вакиллари, сектор раҳбарлари, диний уламолар ҳамда шу кунларда вилоятимизда ўтказилаётган «Маънавият фестивали» тадбирининг тарғибот гуруҳи аъзолари ҳам иштирок этишди.