2022 йилда 12 045 нафар зиёратчи Ҳаж амалларини, 61 мингдан ортиқ зиёратчи эса Умра амалларини адо этди. Бу ҳақда АОКАда ўтказилган брифингда Дин ишлар бўйича қўмита бўлим бошлиғи Сирожиддин Саломов маълум қилди.

«Фуқароларимизнинг муқаддас зиёратга бўлган эҳтиёжларини тўлақонли қондириш мақсадида Жамоатчилик кенгаши қарори асосида Ҳаж ва Умра сафарларини ташкил этиш янги босқичга кўтарилди», — деди Сирожиддин Саломов.

Унинг таъкидлашича, ўтган йилда Умра сафарига борувчи зиёратчилар сонини белгилаш бўйича квота олиб ташланган, натижада республиканинг айрим ҳудудларида навбатлар тугатилган, баъзиларида эса навбатларининг сезиларли даражада камайишига эришилган.