Ижтимоий тармоқларда бир нечта Insta-блогерлар кўчада одамларни калтаклаб ёки масхара қилиб, “пранк” уюштиргани акс этган видеолар тарқалди.

Insta-блогерларнинг ҳурмача қилиғини Тошкент шаҳар Ички ишлар бош бошқармаси эътиборсиз қолдирмади.

ИИББнинг маълум қилишича, кеча, 28 сентябрь куни Тошкент шаҳрининг Мирзо Улуғбек туманидаги марказий истироҳат боғида сайёр суд мажлиси бўлиб ўтган ва унда “пранк” қилган икки блогер суд қилинган.

Жиноят ишлари бўйича Мирзо Улуғбек тумани судининг қарори билан блогерларга нисбатан Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (Ички ишлар органи ходимининг қонуний талабларига риоя қилмаслик) бўйича уларга 15 сутка қамоқ жазоси тайинланган.