Sirdaryoda “Hashartepa” (IX – XII asrlarga oid) yodgorligining 6,4 m/kub qismi hojatxona va hammom qurish uchun uchun qisman buzilgan. Bu haqida Bosh prokuratura xabar berdi.

Maʼlum boʻlishicha, madaniy meros obyektlarining yana bir nechta qismi turli sabablarga koʻra zararlangan.

Jumladan:

◻️ Qashqadaryoda “Kofirtepa-2” (VII – XIII asrga oid) yodgorligining 2,4 m/kub, “Beshteraktepa”ning (IX – XII asrlarga oid) 6 m/kub hamda “Xontepa”ning (XI – XIII asrlarga oid) 189 m/kub qismi uy-joy qurish uchun;

◻️ Jizzaxda “Tomoshotepa-2” (IV – V asrlarga oid) yodgorligining 14 m/kub qismi hojatxona hamda “Qoratepa”ning (V – VI asrlarga oid) 30m/kub qismi issiqxona qurish uchun;

◻️ Navoiyda “Gʻazgʻontepa” yodgorligining 16 m/kub qismi mobil kompaniya antennasi, “Nonvoylartepa-2”ning 5,3 m/kub, “Kaltepa”ning (V – VIII asrlarga oid) 23 m/kub hamda “Yasiltepa”ning (III – XI asrlarga oid) 20 m/kub qismi xoʻjalik inshootlari qurish uchun;

◻️ Toshkent viloyatida “Nomsiztepa-1” yodgorligining 15 m/kub qismi xojatxona, “Nomsiztepa-2”ning 1,92 m/kub qismi issiqxona qurish uchun qisman buzilgan.

Xabarga koʻra, yuqoridagi jami 12 ta yodgorlikka 8,3 mlrd. soʻmlik zarar yetkazilgani aniqlanib, jinoyat ishlari qoʻzgʻatilgan va hozirda dastlabki tergov harakatlari olib borilmoqda.