Poytaxtimizdagi Xalqaro shaxmat akademiyasida start olgan o‘zbekistonlik birinchi grossmeyster Georgiy Agzamov xotirasiga bag‘ishlangan XIV an’anaviy xalqaro turnirda 3-tur o‘yinlari nihoyasiga yetdi. Dunyoning 12ta davlatidan 150 nafar "aql gimnastikasi" ustalari qatnashayotgan ushbu musobaqaning «A» guruhida hozircha hamyurtimiz Nodirbek Abdusattorov yo‘qotishlarsiz odimlamoqda.

   Turnirning 1-tartib raqamli ishtirokchisi Abdusattorov 3-turda belaruslik Kirill Spivakni mag‘lub etdi. Musobaqada g‘oliblikka asosiy da’vogarlardan biri armanistonlik Shant Sargisyan ham hozircha 100 foizlik natija qayd etib turibdi. U 3-turda ozarbayjonlik xalqaro master Muradli Muxammad ustidan g‘alaba qozondi. Shuningdek, yana bir armanistonlik shaxmatchi Tigran Arutunyan hamda Eron Islom Respublikasi vakili Arian Golamilar ham 3 o‘yindan 3 ochko jamg‘argan holda yetakchilar safida.

   Yosh, umidli shaxmatchimiz Xumoyun Bekmurodovning 2,5 ochko bilan 5-8-o‘rinlardan joy olib turganligi tahsinga loyiq. Hamyurtlarimizdan Nodirbek Yoqubboyev hamda Bobir Sattorovlar ham xuddi shuncha ochko jamg‘argan.

   Musobaqa davom etmoqda.