Namangan viloyati Uchqoʻrgʻon tumanidagi xonadonlardan birida yongʻin sodir boʻldi. Bu haqda viloyat Favqulodda vaziyatlar boshqarmasi axborot xizmati xabar berdi.

Qayd etilishicha, yongʻin haqidagi xabar 2021-yilning 18-dekabr kuni soat 02-34da kelib tushgan va Uchqoʻrgʻon tuman Favqulodda vaziyatlar boʻlimi yongʻin qutqaruvchilari tomonidan soat 02-40da yongʻin joyi oʻrab olingan.

Yongʻin oqibatida yashash uyining ichki qismi, shuningdek, qoʻshni uylar va uyga kirish yoʻlak devorlari yonib zararlangan.

Yongʻinni oʻchirish vaqtida uyning ikkinchi qavatida 10-xonadon egasining kuygan holdagi jasadi, yashash uyining yuvinish xonasida esa farzandining tutunga dimiqqan holatdagi jasadi topilgan.

“Uyda istiqomat qiluvchi 6 nafar ayol, 6 nafar erkak va 4 nafar voyaga yetmagan bolalar Uchqoʻrgʻon tuman Favqulodda vaziyatlar boʻlimi yongʻin qutqaruvchilari tomonidan xavfsiz hududga evakuatsiya qilindi. Hozirda sodir boʻlgan yongʻin yuzasidan tergovga qadar surishtiruv ishlari olib borilmoqda”, deyiladi xabarda.