Uy-joy kommunal xizmat ko‘rsatish vaziri va Toshkent viloyati Nurafshon shahri hokimi lavozimlarida ishlagan Muzaffar Saliyev 7 yilga ozodlikdan mahrum etildi. U talon-toroj qilish va mansab soxtakorligi jinoyatlarida aybdor deb topilgan.

Saliyevga nisbatan ish joriy yil 13-mart kuni JIB Shayxontohur tuman sudida ko‘rib chiqilgan. Birinchi instansiya sudining hukmiga ko‘ra, sobiq vazir Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) “a” va “v” bandlari hamda 209-modda (Mansab soxtakorligi) 2-qismining “a”, “b” bandlarida nazarda tutilgan jinoyatlarni sodir etganlikda aybdor, deb topilgan. Sud hukmiga ko‘ra, sobiq hokim va vazir 3 yil mansabdor va moddiy javobgar shaxs lavozimida ishlash huquqidan mahrum qilingan va uzil-kesil 7 yil muddatga ozodlikdan mahrum qilingan. Jazoni umumiy tartibli koloniyalarda o‘ta`sh belgilangan.

Appelyatsiya instansiyasining 2024-yil 30-iyuldagi ajrimi bilan birinchi instansiya sudining hukmi o‘zgarishsiz qoldirilgan.

Muzaffar Saliyev 2017-yil 5-iyuldan 2021-yil yanvarigacha uy-joy kommunal xizmatlar vaziri lavozimida ishlagan. U Vazirlar Mahkamasida o‘tkazilgan tanqidiy yig‘ilishdan keyin ishdan olingan edi. U 2023-yil boshida vazir lavozimidagi faoliyati bilan bog‘liq ish yuzasidan tergovga jalb etilgani xabar berilgan edi.

2021-yil 15-yanvarda esa Nurafshon shahri hokimi lavozimiga tayinlagan. Saliyev, shuningdek, faoliyati davomida mudofaa vazirining shaxsiy tarkib bilan ishlash bo‘yicha o‘rinbosari lavozimida ham ishlagan.