Oʻzbek tilining mamlakatimiz ijtimoiy hayotida va xalqaro miqyosdagi obroʻ-eʼtiborini oshirish, mamlakatimizda davlat tilini toʻlaqonli joriy etishni taʼminlash borasidagi tashabbuslarni qoʻllab-quvvatlash va ragʻbatlantirish maqsadida Vazirlar Mahkamasining Davlat tilini rivojlantirish departamenti hamda Oʻzbek tilini rivojlantirish jamgʻarmasi tomonidan “Jonajon oʻzbek tilim” tanlovi e’lon qilindi.
Tanlov quyidagi yo‘nalishlarda o‘tkaziladi:
- oʻzbek tilining oʻziga xos xususiyatlari, muammo va yechimlari yoritilgan eng yaxshi ilmiy tadqiqot;
- oʻzbek tilini raqamlashtirishga qaratilgan eng yaxshi dasturiy mahsulot;
- oʻzbek tilining boy imkoniyatlari tarannum etilgan eng yaxshi badiiy-ijodiy asar;
- davlat tili boʻyicha ommaviy axborot vositalarida eʼlon qilingan eng yaxshi material;
- oʻzbek tili targʻibotiga bagʻishlangan eng yaxshi videorolik;
- oʻzbek tilini xalqaro miqyosida ommalashtirishga xizmat qilayotgan eng yaxshi amaliy ish;
- oʻzbek tilining xorijlik doʻstlari tomonidan yaratilgan eng yaxshi ilmiy-ijodiy ish.
Tanlovda ishtirok etuvchi nomzodlar o‘zi haqidagi ma’lumotlarni (ismi, otaismi, familiyasi, ish joyi, o‘qish joyi) ilmiy-ijodiy ishining elektron nusxasini ilova qilgan holda Tanlov ishchi organi – Oʻzbek tilini rivojlantirish jamgʻarmasi yoki rasmiy elektron pochtaga (uz_tili_jamgarma@umail.uz) hamda (@Jonajontilim_bot) telegram ijtimoiy tarmog‘iga 5-oktabrgacha yuborishlari lozim.
Tanlovda yakka tartibda yoki jamoa bo‘lib ishtirok etish mumkin.
G‘oliblar bazaviy hisoblash miqdorining 50 barobari miqdoridagi pul mukofoti, diplom va esdalik sovg‘alari bilan taqdirlanadi.
Mukofotlar 21-oktabr – O‘zbek tili bayrami kuni arafasida tashkil etiladigan tadbirlar doirasida tantanali ravishda topshiriladi.
Izoh yo‘q