Маълум бўлишича, жорий йилнинг апрель ойида «Замонавий аёллар» клуби томонидан «Atlas Party» номли миллий либослар тарғибот тадбири ўтказилган. Тадбирдан олинган видеолавҳалар эса ижтимоий тармоқларга жойлаштириб борилган.

Ушбу лавҳаларга нисбатан номаълум эркак салбий муносабат билдирган. Унинг мазкур тарғибот тадбирида иштирок этган аёлларни обрўсизлантирувчи ҳақоратли сўзлари акс этган видеоролик ижтимоий тармоқларда тарқалди ва бу кенг жамоатчилик муҳокамаларига сабаб бўлди.

Шу сабабли, мазкур ҳолат юзасидан «Atlas Party» тадбирининг бир қатор иштирокчилари ички ишлар идораларига ушбу шахсга нисбатан қонуний чора кўриш учун ариза билан мурожаат қилган.

Олиб борилган тезкор-суриштирув тадбирлар натижасида мазкур шахс 1988 йилда Сирдарё вилоятида туғилган фуқаро М.Д. эканлиги аниқланган.

Аниқлик киритилишича, 2024 йилнинг 23 апрель куни фуқаро М.Д. Шайхонтоҳур тумани ИИО ФМБга таклиф этилган ҳамда у ўзининг шахсий диний қарашларидан келиб чиққан ҳолда атлас тарғиботини олиб борган аёлларга нисбатан ҳақоратли сўзлар ишлатганини таъкидлаб ўтган.

Хулосага кўра, ушбу ҳуқуқбузарлик ҳолати тегишли тартибда Шайхонтоҳур туман суди томонидан кўриб чиқилиб, фуқаро Ўзбекистон Республикаси Маъмурий жавобгарлик тўғрисидаги кодекснинг 183-моддаси («Майда безорилик») асосида М.Д. га нисбатан 15 сутка муддатга маъмурий қамоқ жазоси тайинланган.