Тошкент шаҳрининг Сергели туманидаги мактабда ўқитувчи хато қилган ўқувчиларини жазолашда шафқатсизлик қилиб, уларнинг қўлига игна ва «саморез» санчиб келгани маълум бўлди, деб хабар бермоқда Дарё.

Маълум бўлишича, нашрга бу ҳақида тумандаги 277-мактабда ўқийдиган болаларнинг оналари хабар берган.

«Шаҳзода қизим мактабнинг биринчи синфида ўқийди. Унинг ўқитувчиси С.Р. болаларни жазолаш учун уларнинг қўлига игна, «саморез» санчиб, шафқатсизлик қилиб келган экан. Бу ҳақда ота-оналар яқинда билдик, — деган оналардан бири.

Аниқлик киритилишича, ҳолат 2023—2024-ўқув йили бошидан бери такрорланиб келган.

Болаларимизга «бу ҳақда кимгадир айтсанг, бундан баттарини қилиб, қўлингга мих тиқаман» деб қўрқитган экан, — деган яна бир ўқувчининг онаси.

Хабарга кўра, ўқитувчи эндигина биринчи синфга чиққан ўқувчиларнинг қилган хатоси учун шу тариқа жазолаш йўлини танлаган.

«Биринчи синф ўқувчиси эндигина ҳарф таниётган бўлса, ўқитувчи болалар қилган ҳар бир имловий хато учун уларнинг қўлига игна ва «саморез» санчиб, болаларимизнинг жонини оғритган. Бу ҳолат анчадан бери содир бўлиб келган. Болалар қўрқитилгани учун бизга айтмаган, — деган жияни шу мактабда ўқишини айтган Фотима Юсупова исмли аёл.

Ҳолат очиқланган сўнг ота-оналар бугун, 16 апрель куни мактаб директори қабулига кирган. Директор эса ҳолат у мактабда йўқ пайтида содир этилганини айтиб, «сувдан қуруқ чиқиш»га уринган.

«Директор ўқитувчига ҳайфсан берганини айтди, ўқитувчи бўшаш ҳақида ариза ҳам ёзибди. Лекин хатосини тан олгиси йўқ. У шу йўл билан болаларимизни ўқитаётганини, билим бераётганини айтмоқда, — деган ота-оналар.

Ҳозирда нашр воқеа юзасидан қўшимча маълумот олиш мақсадида Сергели туман Мактабгача ва мактаб таълими бўлими раҳбари ҳамда 277-мактаб директори билан боғланган.

«Тез орада масъулларнинг бу ҳақдаги маълумотлари эълон қилинади», дейилади хабарда.