Қозоғистонда атом электр станцияси (АЭС) қурилиши бўйича референдум 2024 йилнинг кузида бўлиб ўтади. Бу ҳақда 27 июнь куни ОАВ ходимларини тақдирлаш маросимида мамлакат президенти Қосим-Жомарт Тўқаев айтиб ўтди.

«Мамлакатда атом энергетикасини ривожлантириш учун катта имкониятлар мавжуд. Улардан тўғри ва самарали фойдаланиш муҳим. Бу масала бўйича якуний қарорни халқ қабул қилади. Референдум шу йилнинг кузида бўлиб ўтади», – деган Тўқаев.

Қозоғистон раҳбарининг аниқлик киритишича, референдумнинг аниқ санаси кейинроқ ҳукумат томонидан аниқланади.

Қозоғистон энергетика вазири ўринбосари Сунгат Есимханов журналистларга берган изоҳида референдум қандай ўтказилишини маълум қилган. «Референдум аҳолининг атом электр станциясини ёқлаши ёки қаршилигини билдириши ҳақида бўлади. Қарор қабул қилингандан сўнг, аллақачон механизм, қисқа рўйхат, кимни (АЭС қурувчи давлат) танлаш кераклиги ва ҳоказо. Вариант иккита — „ёқлайман« ёки „қаршиман« бўлади. Мен шундай деб ўйлайман, лекин буни ҳукумат белгилайди», – деди у.

Қозоғистонда атом электр станциясини қуриш бўйича мунозаралар бир неча йилдан бери давом этиб келмоқда. 2023 йил центабрида Тўқаев бу масалани референдумга қўйишни таклиф қилганди. АЭС қурилиши учун жой сифатида Олмаота вилоятининг Балхаш кўли қирғоғидаги Улкан қишлоғи танланди ва шу ерда илк оммавий муҳокамалар бўлиб ўтди.