– Bunday voqealarni faqat kinoda ko‘rgan edim. Sizlarga aytsam hozir, ertakday tuyuladi...

O‘sha suv toshgan kuni uy-joyini, mol-holini tashlab jonhaybatda qochayotgan odamlarning yuz-ko‘zidagi tahlika hech esimdan chiqmaydi. Ollohim hech bir bandaga bunday holatni ko‘rgulik qilmasin!

Mashinamda odamlarni toshqin yetib bormaydigan joylarga tashidim ertalabdan. Faqat men emas, Guliston, Baxt taraflardan ham mashinalar kelib, kun bo‘yi yurtdoshlarimizga xizmat qildi. Tekin.

Olloh rozi bo‘lsin, o‘sha kuni shu atrofdagi metan gaz, benzin quyish shaxobchalari ham odamlarni xavfdan qutqarayotgan mashinalarga tekin yonilg‘i quyib turdi!

... Endi har xil odam bor. Kirakashlik qiladigan bir hamqishlog‘imiz o‘sha kuni suv balosidan qochayotgan odamlarni, o‘zimizning hamqishloqlarni 2 ming so‘mlik joyga 20 mingdan, 3 ming so‘mlik joyga 30 mingdan pulini olib tashidi...

Olloh buyuk! Bilasizmi, o‘sha kuni odamlarga tekin xizmat qilgan qancha mashinalar qolib, o‘sha qishloqdoshimizning, g‘am-kulfatdan ham pul qilgan kishining mashinasini suv olib ketdi! Urilib-surilib, parcha-parcha temirga aylanib qoldi!

Eskartish:  kuni kecha ukam Samarqanddan qaytishda Sardobadan 30-35 yoshlar chamasi bir yigitni Toshkentgacha olib kelganida shu gurungni beribdi. O‘zi jismoniy tarbiya o‘qituvchisi ekan maktabda. Ukam jurnalist emas-da:  ismini so‘ramabdi...

Husan Karvonli