Ижтимоий тармоқларда сартарош ва мижоз ўртасидаги келишмовчилик тасвирланган видео тарқалмоқда.

Видеога кўра, мижоз соқолини олдирмоқчи бўлган ва ундан кейин сочини олдиришни билдирган.

Мижознинг соқолини олиб бўлган сартарошга бу ёқмаган ва жаҳли чиққан. «Билмай қолдим» дея жавоб берган мижозга у шундай деб жавоб қайтарган:

«Қарада. Ҳаммамиз одамиз, а? Ман цанга тушунтирдим. Соқолимни тўғриланг дединг, тўғриладимми? «Чўлка»мни кесинг дединг, кесяпман. Сийраклатинг деяпсан, сийраклатяпман. Тўғрими? Энди ҳаммасини биттада айтиб қўймайсанку. Ака, мени «чоч»имни олинг, кейин соқолимни олинг демайсанми?… Мен бу ердан (соқолдан) чиқмайман, ман тепадан (бошдан) тушиб келаман».

Бу вақтда мижоз йигит «узр, узр» деб турган.

Шундан кейин сартарош йигитнинг қаерда, ким билан ишлашини, нима иш қилишини сўраган. Мижоз шу яқин атрофда бобоси билан «уй кўтариш»ини айтган. Ана шундай жавобдан сўнг сартарош йигитнинг сочини калга олиб ташлаган.

«Мана, укам… Нима қилоласан? Нима бўлади? Кимни чақирасан, бувангними? Мана видео-запис, ҳамма «голосовой»ларим бор. Айтяпман, тушунтиряпман. Мана (видеога) оляпти оғайним. Видео-запис, ҳамма нарсам бор. Бор! «Учасвойга айтасанми? Кимга айтасан? Судга айтасанми? «милиса» келадими олдимга?… Тушунтиряпманми сенга? Яна нима қилиб берай, укам?» – деган сартарош юқоридаги ҳаракатидан кейин.

«Ака, адашибман» деб мижоз гапирганда, яна сартарош ўзини оқлашга уринган:

«Мендамаску айб. Нимага сен адашасану, мен жавоб бераман? Тўғрими, укам, гапим? Нима қилиб берай ҳозир? «Полний» олган жойимга сочингни қўйиб берайми?» – деган у.

Видеодан аниқ бўладики, мижоз йигит сартарошга тўғри тушунтириб беролмаган.

«Тўғри тушунтирганингда, пулингни ҳам олмасдим. Пулинг ҳам керакмас менга… Нима бўлади энди? Битта мана шу калга олиб қўйганим учун «милиса»га берасанми? (видеога олаётган томонга қараб) Ол! Видеога ол, мен кўрсатаман ҳаммасини», – сартарош шундай деб боланинг чала олинган сочини яна олиб бошлаган.

Маълумот учун, сартарош биринчи йигитнинг сочини калга атайин олган ва кейин юқоридаги гапларни гапирган.

«Менга унақа қилмаларинг, укам. Ундан кўра менга айтгин, «Ака, мени пулим йў(қ)…« Масаланда, мен сенга келтириб беряпман. «Ака, мени пулим йў(қ), соч-соқолимни олиб қўйинг, яна 10 минг беринг» дегин, мен сенга 20 минг бериманда, яна нонам олиб бераманда… Менга фақат тўғри гапир», – деган сартарош видео охирида.

Мижоз йигит қайта-қайта адашганини айтган. Сартарош эса соч олишда давом этган.

Видео ижтимоий тармоқларда муҳокамаларга сабаб бўлди. Якунда мазкур ҳолат ҳуқуқни муҳофаза қилувчи орган ходимлари томонидан ўрганилди.

Видео ижтимоий тармоқларда тарқалгандан ҳеч қанча ўтмай сартарошнинг узр сўраган видеоси тарқалди.

Маълум бўлишича, у Турғунов Маъмуржон бўлиб, Тошкент туманида яшайди ва ишлайди.

Мижоз билан бўлган воқеа 2022 йил октябрь ойларида бўлиб ўтган.

Аниқланишича, мижознинг исми Жасур.

«Жасур исмли фуқародан, унинг ота-онасидан, ака-укаларидан, яқинларидан узр сўрайман. Ушбу ҳолат бўйича қонунда белгиланган ҳар қандай жазога розиман. Қилган ишимдан пушаймонман. Ўзбекистон халқидан узр сўрайман. Бундай ҳолат мен томонимдан умуман содир этилмайди», деган сартарош узр сўраш жараёнида.