Navoiy viloyati hududida joylashgan qadimgi Hazora qishlogʻidagi meʼmoriy yodgorlik – Deggaron masjidi VII–IX asrlarda qurilgan bino oʻrniga XI asrda bunyod etilgan.

Bu Navoiy viloyatida topilgan masjidlardan eng qadimgisi. Keyinchalik, masjid, sopol qozon yasovchilar mahallasi guzarida joylashgani uchun "Deggaron masjidi" deb nomlangan. Oʻrta asrlarda Hazora oʻrtacha shahar sifatida mashhur edi. Yonida esa bir kanal qazilgani eski arab manbalarida zikr etilgan. Shahar Buxoro vohasining "Ulkan choʻl" bilan chegarasida qoʻriqlash funksiyalarini bajargan va "Kampir duvol" deb atalmish eski fortifikatsiya tizimiga kirgan.

Masjidning tashqi koʻrinishi kub shaklida, usti gumbazlar bilan yopilgan, xona ichida pishiq gʻishtdan toʻrt gʻoʻla (ustun) ishlangan. Qolgan devori xom gʻishtdan tiklanib, yuzasi pishiq gʻisht bilan qoplangan. Toʻrt rukn – ustun (diametri 128 sm) xonaqoh ichini devorsiz toʻqqiz qismga ajratgan. Markaziy qismi nisbatan yirikroq gumbaz bilan yopilgan. Boshqa qismlarga – bir tomonidan devorga, qarshi tomonidan ustunga tayantirib, yana sakkizta kichik gumbaz ishlangan. XX asrda masjidning janubiy va sharqiy devorlariga taqab sinchkor ayvon qurilgan. Ayvon ustunida binoning 1910-yili qayta qurilgani qayd etilgan. Keyinchalik ayvonlari vayron boʻlgan.