Ўзбекистон Республикаси Президенти Шавкат Мирзиёев Сеул шаҳридаги ўзига ажратилган қароргоҳда Корея Республикаси Бош вазири Хан Сон Сукни қабул қилди.

Алоҳида стратегик шериклик муносабатларини савдо-иқтисодиёт, инвестициялар, технологиялар, транспорт-логистика соҳаларида янада мустаҳкамлаш масалалари кўриб чиқилди. Инновацион-технологик ҳамкорликни чуқурлаштиришга устувор аҳамият қаратилди.

Савдо, молия ва инвестиция, рақамли иқтисодиёт ҳамда киберхавфсизлик соҳаларида, Кореянинг илғор технологиялари ва Ўзбекистоннинг хомашё базасидан фойдаланган ҳолда муҳим минералларни қайта ишлаш борасида, шунингдек, транспорт ва темир йўл инфратузилмаси ҳамда ҳудудлараро алоқалар йўналишларида шериклик истиқболлари муҳокама қилинди.

Шунингдек, Ўзбекистон Республикаси Президенти ва Корея Республикаси Бош вазири қўшма бизнес форумнинг очилишида иштирок этишди.

Тадбирда икки мамлакат давлат тузилмалари ва ишбилармон доираларининг 300 нафардан зиёд вакили, хусусан, етакчи молия институтлари, йирик саноат корхоналари ва савдо компаниялари раҳбарлари қатнашишди. Масалан, Корея томонидан «Lotte Chemical», «Hyundai Motor Group», «Samsung C&T», «CJ Group», «Shinhan Financial Group», «Hyundai Rotem», «KIND», «BOMI», «Kia Corporation», «Sampyo Group», «Hansae Mobility» каби йирик компаниялар шулар жумласидандир.

Давлатимиз раҳбари ўз сўзида Корея Ўзбекистоннинг вақт синовидан ўтган дўсти ва алоҳида стратегик шериги эканини, савдо-иқтисодий ва инвестициявий ҳамкорлик эса Ўзбекистон – Корея кўп қиррали ҳамкорлигининг устувор йўналишларидан бирини ташкил этишини таъкидлади.

Етакчи корейс компанияларининг Ўзбекистонда самарали фаолият юритиб, мамлакатимиз иқтисодиётини ривожлантиришга салмоқли ҳисса қўшаётгани алоҳида қайд этилди.

Шавкат Мирзиёев томонидан Ўзбекистоннинг ресурс салоҳияти, Кореянинг илғор технологиялари ва икки мамлакат компанияларининг инвестициявий имкониятларини бирлаштириш орқали янги иқтисодий ўсиш нуқталарини яратиш таклиф этилди.

Президент келгусида иқтисодий шерикликни янада ривожлантиришнинг асосий йўналишларини белгилаб берди.

Жумладан, саноат кооперациясини ривожлантириш ва ишлаб чиқаришнинг тўлиқ занжирларини шакллантириш, энергетика ва «яшил иқтисодиёт», транспорт ва замонавий инфратузилма, рақамлаштириш ҳамда сунъий интеллект, яримўтказгичлар ва микроэлектроника, биотехнология ва фармацевтика, қўшма илмий тадқиқотлар ўтказиш, илғор технологияларни жорий этиш, кадрлар тайёрлашда ҳамкорлик қилиш ва бошқа йўналишлар кўрсатиб ўтилди.

Корея компаниялари мисни қайта ишлаш, электротехника ускуналарини ишлаб чиқариш, автомобиль ва электромобиль саноати учун бутловчи қисмларни маҳаллийлаштириш, робототехника ва автоматлаштириш, биотехнология ва фармацевтика, гидроэнергетика, энергияни сақлаш тизимлари, энергетика тармоқларини модернизация қилиш ҳамда транспорт ва шаҳар инфратузилмасини ривожлантириш бўйича лойиҳаларни амалга оширишга таклиф этилди.

Саноат-технологик ҳамкорликни янада чуқурлаштиришнинг амалий механизми сифатида Ўзбекистон – Корея саноат-технологик альянсини тузиш таклиф этилди.

Президентимиз мамлакатимизда корейс бизнесининг фаолияти учун келгусида янада қулай шарт-шароитларни яратиш ҳамда қўшма лойиҳаларни амалга оширишда амалий кўмак кўрсатишга тайёр эканини билдирди.