Ўзбекистонда мактаб дарсликларини 2027−2031-йилларда янгиланган ўзбек алифбосига тўлиқ ўтказиш режалаштирилмоқда. Бу ҳақда Мактабгача ва мактаб таълими вазири ўринбосари Азизбек Турдиев Сенатнинг 19-сентябрдаги мажлисида маълум қилди. Шунингдек, ОАВ янгиланган ўзбек алифбосида ишлаши мажбурий бўлади. Бу ҳақда Вазирлар Маҳкамаси Давлат тилини ривожлантириш департаменти раҳбари Нодиржон Жонузоқов таъкидлаб ўтди.

Сенатор Дилбар Сувонова алифбо ўзгариши муносабати билан дарсликлар, ўқув қўлланмалари, дастурлар ва адабиётларни қайта ишлаш муддатлари белгиланганми-йўқми ҳамда бунга қўшимча маблағлар назарда тутилганми, деб қизиқди. Вазир ўринбосари Вазирлар Маҳкамаси қонунни амалга ошириш бўйича чора-тадбирлар дастурини тасдиқлаши кераклигини айтди.

Ижро ҳокимияти органлари ва Фанлар академияси ўз таклифларини, жумладан Мактабгача ва мактаб таълими вазирлиги — дарсликларни янгилаш ҳамда ўқитувчи ва ўқувчиларни тайёрлаш бўйича таклифларини юборган.

Унинг сўзларига кўра, дарсликлар ҳозир ҳам белгиланган даврийлик билан янгиланиб борилмоқда: 1-синфлар учун — ҳар йили, 2−4-синфлар учун — уч йилда бир марта, 5−11-синфлар учун — беш йилда бир марта.

“2027 йилдан бошлаб, қонун кучга киргач, биринчи синф учун дарсликларни ҳар қандай ҳолатда ҳам янги алифбодан фойдаланган ҳолда чоп этамиз”, деди вазир ўринбосари.

Азизбек Турдиев.

У 2027−2031-йилларда барча мактаб дарсликлари уларни қайта нашр этишнинг одатий сикли доирасида янгиланишини қўшимча қилди.

“2027 йилдан 2031-йилгача барча дарсликларимиз тўлиқ янгиланади. Бу нуқтайи назардан қўшимча маблағ талаб қилинмайди”, — деди вазирлик вакили.

Вазирлик, шунингдек, ўқитувчи ва ўқувчиларни мослаштириш бўйича чора-тадбирларни тайёрламоқда. Вазир ўринбосарининг сўзларига кўра, янги ўқув йили бошланишидан олдин мактабгача ва мактаб таълими тизимида ўқув семинарларини ўтказиш режалаштирилган. Мажлисда ислоҳотдан сўнг имтиҳонлар қайси алифбода ўтказилиши масаласи алоҳида муҳокама қилинди.