Меҳнат муносабатларини расмийлаштиришни соддалаштириш, ортиқча бюрократик тўсиқларни бартараф этиш ҳамда ходимларнинг ҳуқуқларини ишончли ҳимоя қилишга қаратилган янги қонун лойиҳаси Қонунчилик палатаси депутатлари томонидан қабул қилинди ва Сенатга юборилди.

Янги қонун билан Меҳнат кодексининг 333-моддасига муҳим ўзгартириш ва қўшимчалар киритилмоқда. Ушбу ҳужжат мамлакат меҳнат бозорида қоғозбозликни камайтириш ва ходимларнинг кафолатларини кучайтиришда янги даврни бошлаб беради.

Энг катта қулайликлардан бири — фуқароларни ишга қабул қилишда талаб этиладиган ҳужжатлар рўйхати кескин қисқартирилмоқда. Янги тартибга кўра, ишга жойлашишда фуқародан асосан унинг шахсий идентификация рақами (ЖШШИР) талаб этилади. Фақатгина ҳарбий хизматга мажбурлар ва чақирилувчилар қўшимча равишда ҳарбий гувоҳнома ёки ҳарбий ҳисобда турганлик ҳақидаги гувоҳномани тақдим этади.

Меҳнат муносабатларини рақамлаштириш бўйича ҳам инқилобий янгилик жорий этилмоқда. Эндиликда электрон рақамли имзо (ЭРИ) ёки биометрик идентификация (Face-ID) орқали тасдиқланган барча меҳнат ҳужжатлари юридик жиҳатдан қўлда имзоланган қоғоз ҳужжатлар билан тенг ҳисобланади. Бу эса масофадан туриб ҳам осон ва тезкор шартномалар тузиш имконини беради.

Қонун лойиҳасида нафақат техник қулайликлар, балки ходимларнинг ижтимоий ҳимоясини кучайтиришга ҳам жиддий эътибор қаратилган: Меҳнат жараёнида ходимларга нисбатан ҳар қандай кўринишдаги тазйиқ ва зўравонлик ҳолатларини қатъий тақиқлаш, уларнинг олдини олиш ҳамда жабрланган ходимларни ҳимоя қилиш чоралари белгиланмоқда.

Иш берувчи томонидан иш ҳақи тўлаш муддати бузилган тақдирда, ҳар бир кечиктирилган кун учун ходимга мажбурий пулли компенсация тўлаш тартиби аниқ ва қатъий қилиб мустаҳкамланмоқда.

Ушбу қонун лойиҳаси депутатлар томонидан маъқулланди. Эндиликда у Сенат томонидан кўриб чиқилади ва Президент томонидан имзоланганидан сўнг расман кучга киради.