Қозоғистонда россиялик аёл супермаркет ходими унга рус тилида жавоб беришдан бош тортгани учун жанжал кўтарди. Воқеа ижтимоий тармоқларда тарқалиб, кенг резонансга сабаб бўлди. Ҳодиса Олмаотадаги Small дўконида содир бўлган.

Россия фуқароси бўлган Галина Лисс ўзининг Instagram ва TikTok саҳифаларига маҳаллий сотувчи қиз билан жанжаллашган видеосини жойлаштирди. Видеода у менежердан нима учун супермаркетда атиги учта касса ишлаётганини сўраган. Сотувчи қиз унга қозоқ тилида жавоб беришни бошлаганда, Галина агрессив равишда ундан рус тилида гапиришни талаб қилган. Сотувчи эса хотиржам қозоқ тилида жавоб беришда давом этган.

«Менга русча жавоб беринг. Биз қозоқчани тушунмаймиз. Биз руслар бу ерда (навбатда) турибмиз... Марҳамат қилиб, русча жавоб беринг. Мен сизга савол беряпман, қоидадаги каби жавоб беринг!» – дея талаб қилган россиялик аёл.

У видеони ижтимоий тармоқларда тарқатиш билан таҳдид қилган ва охир-оқибат шундай қилган ҳам. Галина эҳтимол уни қўллаб-қувватлашларига умид қилган, лекин аксинча, у танқидлар ёмғири остида қолиб кетган.

Ижтимоий тармоқларда ушбу видео остида «Ҳеч ким сизга русча жавоб беришга мажбур эмас, сиз Россияда эмассиз», «Қозоқчани ўрганинг. Яшаётган давлатингизни ҳурмат қилинг», «Сотувчи тўғри қиляпти, баракалла қизалоқ» каби минглаб изоҳлар қолдирилган.

Шундай кейин, Смалл супермаркетида жанжал кўтарган россиялик аёл суд қилиниб, жаримага тортилган. Унга 86 500 тенге (2 млн 100 минг сўм атрофида) миқдорида жарима қўлланилган.

Полиция ўз баёнотида тажовуз кўрсатиш, номақбул хатти-ҳаракатлар ва жамиятда низо қўзғатувчи провокацион ҳаракатлар амалга оширишга йўл қўйилмаслигини таъкидлаган. Шунингдек, улар фуқароларни ноқонуний контент тарқатмасликка чақириб, бундай ҳаракатлар учун жавобгарлик мавжудлигини эслатган.