* * *

– Rafiqam homiladorlik paytida nuqul “Egizak Lothenlar”ni o‘qirdi. Mana, bir qiz, bir o‘g‘il ko‘rdik, – dedi Karl o‘rtog‘iga.

– Voy xudoyim-yey, unda men tez uyga borishim kerak ekan!..

– Nima gap, tinchlikmi?

– Axir, xotinim “Ali bobo va qirq qaroqchi”ni o‘qiyotgandi-da!..

* * *

Xotin hovlida gilam qoqayotgan eriga qarab qichqirdi:

– Qattiqroq silkiyver, boshi og‘rimaydi!

– Bo‘lmaydi-da, – dedi er.

– Nega?

– Changib ketadi.

* * *

Xo‘randa:

– Bu go‘shtmi yo po‘stakmi?

Ofitsiant:

– Bilmadim, buni ho‘kizdan so‘raysiz.

Xo‘randa:

– Shuning uchun ham sizni chaqirdim-da…

* * *

Qo‘shni:

– Skripka chalishni bas qilasizmi-yo‘qmi? Jinni bo‘lib qoldim-ku.

– To‘g‘ri aytasiz, chunki to‘xtatganimga yarim soat bo‘ldi.

* * *

Bir meksikalik ish bilan syurixga keldi. Mehmonxonada undan

so‘rashdi:

– Ismi-sharifingiz?

– Don Manuel de la Fuente de Mora Aragon de los Sanches.

– Hammalaringga joy kerakmi?

* * *

Peter bilan Shtefan o‘rtaga 100 frankdan pul qo‘yib, kim zo‘r aldashdan garov o‘ynashdi.

– Men kecha uyimiz tomiga chiqib, cherkov minorasiga uchib bordim, – dedi Peter.

Shunda Shtefan pullarga qo‘l cho‘zib, dedi:

– To‘g‘ri aytasan, kecha uchib ketayotganingni ko‘rgandim…

* * *

– Oyi, suzishga borsam maylimi?

– Yo‘q, yolg‘iz o‘zing borishing xavfli.

– Dadam nuqul yolg‘iz o‘zi boradilar-ku!

– Dadangning yo‘rig‘i boshqa. Uning hayoti sug‘urta qilingan.

* * *

O‘qituvchi:

– Nega men seni kichkina tentak deb atayapman?

O‘quvchi:

– Chunki men hali sizga o‘xshab katta emasman-da.

* * *

Doktor:

– Hammasiga sigaret bilan aroq aybdor!..

Bemor:

– Xayriyat-ye, janob doktor, ayb mendamikin deb o‘ylabman.

* * *

Sudya:

– Nega siz nuqul kunduz kuni o‘g‘irlik qilgansiz?

Ayblanuvchi:

– Kechasi ko‘p pul bilan yurishga qo‘rqaman-da.

* * *

O‘g‘il:

– Uylanish qanchaga tushadi?

Ota:

– Aniq bilmadim, men haliyam to‘layapman.

* * *

Futbolchi do‘stiga maqtandi:

– Bugun men rosa zo‘r o‘ynadim. Ikkita gol urdim.

– O‘yin natijasi qanday bo‘ldi?

– 1:1.

* * *

– Bolalardan nechta, janob Tenner?

– O‘n uchta.

– Voy-bo‘, bitta uyda qisilishib qolmaysizlarmi?

– Nega endi?! Bolalar o‘z onalari bilan turishadi.

* * *

Ular Yangi yil oqshomida tanishib qolishdi.

Yigit:

– Jonim, birinchi sevgiling o‘zim bo‘lsam kerak-a?

Qiz:

– Ha, albatta, yangi yildagi birinchisi sensan…

* * *

Poezdda bir yigit o‘zi bilan bitta kupeda ketayotgan qizga nima deb so‘z boshlashini bilmasdi. Axiyri u shunday dedi:

– Kechirasiz, yaxshi qiz, siz ham bizning poezdda ketayapsizmi?

* * *

Bir oilada o‘g‘il dunyoga keldi. Xursand bo‘lib ketgan ota o‘rtoqlarini ziyofatga taklif qilarkan, dedi:

– Kirishda eshikni qattiq tepaveringlar.

– Nega teparkanmiz, taqillatamiz, – deyishdi do‘stlari.

– Bemalol tepaveringlar, chunki sovg‘a ko‘tarib olgan qo‘l bilan eshikni taqillatish ancha qiyin bo‘ladi.

* * *

Konsert paytida bir ayol erini turtib dedi:

– Ervin, qara, anavi kishi konsert paytida uxlab o‘tiribdi.

– Shuni deb meni uyg‘otganingni qara-ya! – dedi eri jahli chiqib.

* * *

Bir qiz dugonasiga yozg‘irdi:

– Buni qara, mening Toniyim qurg‘ur bugun ham uchrashuvga soqolini olmasdan kelibdi.

– Ayb o‘zingda, jonim, – debdi dugonasi, – axir sen uni bunchalar uzoq kuttirib qo‘ymasliging kerak edi…

* * *

– Agar erim men bilan janjallasha boshlasa, onamnikiga ketaman, deb qo‘rqitaman.

– Men esa buning teskarisini qilaman. Ertadan boshlab oyimni uyga olib kelaman, desam bas, erimning ovozi o‘chadi-qoladi.

* * *

– Anna, dugonajon, keyingi paytda erimning meni sevishiga shubhalanib qolayapman.

– Nima, biron gap bo‘ldimi?

– Ha, mana ikki yildirki, uyga kelmay qo‘ydi…

* * *

Uy bekasi:

– Biznikidan ketayotganingizdan afsusdaman, Rezi. Boshqa joydan tuzukroq ish topdingizmi deyman?

Oqsoch:

– O yo‘q, muhtarama xonim – men erga tegmoqchiman!

* * *

Advokat o‘zidan quyidagi mazmunda vasiyatnoma qoldirdi:

“Men butun boyligimni tevarak-atrofimdagi kishilarning aqlsizligi hisobiga orttirdim va shu bois uni tug‘ilib o‘sgan qadrdon shahrimdagi jinnixona uchun vasiyat qilib qoldirayapman, toki endi o‘sha odamlarning o‘ziga foydasi tegsin”.

* * *

Bir xonim dugonasiga dedi:

– Bilasanmi, ozish uchun doktor menga otda chopishni buyurdi.

– Xo‘sh, natijalar qalay?

– Hozircha yomon emas. Ot ancha ozib qoldi.

* * *

Shifokor bemordan so‘radi:

– Qani, ayting-chi, xotiningizni aldab turasizmi?

– Xotinimni aldamasam, kimni aldayman, doktor.

* * *

– Men sizga hayronman, – debdi doktor doimiy mijoziga, – har kuni tungi soat ikkigacha restoranma-restoran sanqib yursangiz, sizga yana qanaqa uyqu dori kerak?

– Uyqu dori menga emas, xotinimga kerak…

“Jahon adabiyoti” jurnali 2019-yil 4-son

Mirzaali AKBAROV tayyorladi